33ஆவது ஆசியான் பிராந்திய மன்றம் (ASEAN Regional Forum - ARF) கூட்டத்தொடரின் ஓரங்கமாக, வெளிவிவகார அமைச்சர் விஜித்த ஹேரத், எகிப்தின் வெளிவிவகார அமைச்சர் பத்ர் அப்தெலட்டியை (Badr Abdelatty) சந்தித்து இருதரப்பு பேச்சுவார்த்தை நடத்தினார்.

இந்தச் சந்திப்பின்போது, இலங்கைக்கும் எகிப்துக்கும் இடையில் நீண்டகாலமாக நிலவி வரும் நட்புறவை மேலும் வலுப்படுத்துவது தொடர்பாக விரிவாக கலந்துரையாடப்பட்டது.

அத்துடன், இரு நாடுகளுக்கும் பரஸ்பர நலன் கொண்ட பல்வேறு துறைகளில் இருதரப்பு ஒத்துழைப்பை மேலும் விரிவுபடுத்துவதற்கான வாய்ப்புகள் குறித்தும் கவனம் செலுத்தப்பட்டது.

பொருளாதாரம், வர்த்தகம், முதலீடு, கல்வி மற்றும் சர்வதேச ஒத்துழைப்பு உள்ளிட்ட துறைகளில் கூட்டுறவை மேம்படுத்துவதன் அவசியத்தை இரு தரப்பினரும் வலியுறுத்தியதாக தெரிவிக்கப்பட்டுள்ளது.

இந்தச் சந்திப்பு, இலங்கை மற்றும் எகிப்து இடையிலான பாரம்பரிய நட்புறவை மேலும் வலுப்படுத்துவதோடு, எதிர்காலத்தில் இருதரப்பு ஒத்துழைப்பை புதிய பரிமாணத்திற்கு கொண்டு செல்லும் முக்கிய முயற்சியாகக் கருதப்படுகிறது.